CEBU, Philippines - Tulo ka drug personalities ang gipatay sa managlahing pagpamusil nga nahitabo sa dakbayan sa Danao ug sa lungsod sa Dalaguete kaniadtong Martes sa gabii ug kagahapon sa kaadlawon.
Sa Danao, duha ka lalaki nga sila si Nelson Batoon, 48, ug Ranulfo Matiga, 50, nga nalakip sa drugs watchlist sa kapolisan gipamusil patay didto sa Barangay Taboc sa nakalabay’ng kaadlawon.
Nasayran nga samtang natulog sulod sa balay si Matiga ug nagbarug-barog sab sa gawas sa balay si Batoon, kalit lang niabot ang unom ka lalaki ug gipamusil ang duha.
Nangamatay diha-diha dayon ang mga biktima kay nakaangkon sila og daghan kaayong samad-pinusilan. Si Matiga gipusil makatulo sa iyang ulo, duha sa likod, sa dughan ug tiyan, samtang si Batoon nakaangkon og pito ka pinusilan sa ulo ug unom sa likod.
Ang miresponde nga kapolisan nakakaplag og daghang basiyo sa .45 kalibre nga pistola ug 9 mm pistol, ug 38 kalibre nga revolver.
Nag-imbestigar pa ang kapolisan aron mailhan nila kinsa ang mipatay sa mga biktima apan nagtuo sila nga tungod sa drugas ang hinungdan nga sila gipatay.
Samtang sa Barangay Obong, Dalaguete, patay sab sa pagpamusil ang usa ka 33-anyos nga si Jeffrey Carulasan alyas Kingking nga matud pa nalambigit sab sa drugas.
Nahibaw-an nga samtang natulog ang biktima sa ilang balay, gisulod siya sa gunman ug gipusil sa makadaghan nga higayon. Ang inahan sa biktima miangkon sa kapolisan nga tiggamitan gayud og drugas ang iyang anak.
Apan sa nakuha nga inpormasyon sa kapulisan nga namaligya usab og drugas si Carulasan. Gawas sa anggulo sa drugas, susihon usab sa kapolisan ang personal nga motibo kay ilang nasayran nga may record kini sa barangay tungod sa pagpangulata sa iyang kanhi mga kapuyo. (BANAT NEWS)