Koordinasyon sa gobiyerno ug simbahan sa Talisay nahibalik na

CEBU, Philippines - Kapistahan sa Dakbayan sa Talisay malinawon bisan sa mga dagkung kalihukan nga gipahigayon. Kini mao ang gitug-an ni PSupt. Aileen Recla, hepe sa Talisay City Police Station.

Matud ni Recla, walay mga insidente nga natala sa ilang buhatan subay sa mga kalihukan nga gipahigayon ug sa kinatibuk-an malinawon ang kapistahan sa dakbayan.

Si Cebu Archbishop Jose Palma maoy nangulo sa selebrasyon alang sa kapistahan ni Santa Teresa de Avila, ang patrona sa nahisgutang siyudad.

Atol sa maong santos nga misa, giinstalar isip Hermano ug Hermana Mayor sila si Mayor Eduardo Gullas, Mrs. Norma Gullas ug Kongresista Gerard Anthony "Samsam" Gullas.

Sa iyang wali, gipahimug-atan sa arsobispo ang mga maayong panag-ingnan ni Santa Teresa ug subling gipahimangnuan niini ang katawhan sa dakung gugma sa Ginoo ngadto sa iyang katawhan.

Subay sa pagtimaan sa nilabay nga linog ug sa nasinating hinay nga pagtay-og kagahapon, matud ni Palma nga nagpakita lamang kini sa mga parte sa misteryo ug mga pagsuway sa kinabuhi, basta sigurohon lang sa katawhan nga magpadayon sa pagtuo sa dakung gugma sa dios.

Si Fr. Filomeno "Junjie" Ybanez, Jr. kinsa sakop sa team of pastor sa parokya, nitug-an nga malampuson ang ilang kapistahan karon ug aduna nay koordinasyon ang kagamhanan ug ang simbahan. Dako sab ang kalipay ni Kongresista Sam-sam Gullas kay malampuson ang mga kalihukan sa fiesta ug nabalik na sa dakbayan ang  arts, cultural ug religious nga kalihukan niini. (BANAT NEWS)