CEBU, Philippines - Gipatay sa duha ka armadong tawo ang usa ka drayber og habal-habal nga ilang gisaka didto sa iyang gipuy-ang panimalay sa Purok Sunflower II, Barangay Canduman, Mandaue kaniadtong Martes sa kaadlawon.
Si PO3 Nicavero Barverde sa Presinto 6 sa Mandaue City Police Office (MCPO) miingon nga ang gipatay nga si Rodelito Miao, 38, nitahan na kini sa kapolisan kaniadtong Hulyo 4 human malakip sa Oplan Tukhang.
Ang mga armadong tawo nga nagsakay og motorsiklo misaka sa balay sa biktima, samtang may kauban usab nga nagbantay sa silong nga nagsilbe nga lookout.
Gipukaw sa wala hiilhing mga lalaki ang biktima nga natulog ug ang kapuyo sa biktima nga si Gina Mendaros ilang gipagawas sa panimalay.
Si Miao misunod unta sa iyang kapuyo sa paggawas apan gipusil kini sa mga kriminal sa makadaghang higayon. Ang biktima nakaangkon og tulo ka pinusilan sa ulo ug laing upat sa iyang lawas.
Matud ni PO3 Barverde nga dihang si Miao mitahan sa kapolisan tulo ka buwan na ang milabay, misaad kini nga moundang na sa iyang bisyo apan wala mahibaw-i ngano nga siya gipatay. (BANAT NEWS)