Mga tawo sa OBO padugangan

CEBU, Philippines - Mopatawag og executive session si Konsehal Jerry Guardo nga tambungan sa contractor ug developer sa nahugnong retaining wall sa dalan Salvador Extension, Labangon, Siyudad sa Sugbo nga mikalas og usa ka kinabuhi.

Si Guardo nga chairman sa committee on infrastructure sa konseho sa siyudad nagkanayon nga iyang ipatawag ang mga representante sa J.R Abraham C. Lee Construction and Development, Inc. ug Cebu Landmaster nga maoy developer sa Casamira Towers Condominium project.

Tumong niini aron makorehian ang mga kasaypanan nga nakita ug kinahanglang sundon ang mga palisiya sa siyudad aron dili na kini subling mahitabo.

Gusto usab ni Guardo nga ang mga opisyal sa Office of the Building Officials (OBO) mopatuman gyud og istriktong monitoring kung nasunod ba ang mga rekisitos sa Building Code.

Nagplano usab si Guardo nga mopalabang og resolusyon alang sa OBO kini human matud pa ang maong buhatan nagkuwang gyud sa manpower ilabi na nga nagkadaghan sab ang nadawat sa dakbayan nga aplikasyon alang sa mga high-rise buildings.

Gitataw sa konsehal nga gikinahanglan ang dugang pwersa sa OBO tungod kay tumong gyud sa siyudad ang hugot nga monitoring aron mahibaw-an kun ang mga kontraktor nituman gyud sa mga rekisitos ug safety measures.

Samtang si Bise Mayor Edgardo Labella nga niadto sab sa nahitaboan nakasabot ra nganong wala dayon magpasulod ang mga tagtungod sa maong dapit tungod usab sa ka delikado sa lugar.

Apan bisan pa man niini kinahanglan gihapon kining susihon sa taga OBO  (BANAT NEWS)