Memo ni Labella gi-revoked ni Tommy

CEBU, Philippines - Aron dili maglibog ang mga senior citizens kung asa mokuha sa ilang financial assistance, gi-revoked ni Cebu City Mayor Tomas Osmeña ang memorandum order ni Bise Mayor Edgardo Labella nga sa mga barangay ipahigayon ang pagpanghatag niini.

Gipasabot ni Labella nga igo lang niya gisunod ang ordinansa may labot sa pagpanghatag og financial assistance sa mga senior citizens sa siyudad.

Matud ni Labella nga katungod ni Osmeña ang pag-revoked sa memorandum apan iyang gitataw nga ang iyang gihimo mao lang ang pagprotehir sa kwarta ug disbursing offices.

Niabot sa bise mayor ang taho nga ang mo-distribute sa financial assistance mga pribadong tawo. Daghan ang nagtuo nga gituyo kini isip pagpangandam sa umaabot nga barangay ug sangguniang kabataan elections karong Oktubre apan alang kang Labella dili kini angay buhaton.

Nipadala og suwat si Labella sa Office of the Ombudsman ug iyang giklaro nga dili kini reklamo apan hangyo lang sa ahensiya nga manginlabot sa maong problema.

Gipaabot nga karong Agosto 20 ihatag ang tag P2,000 nga financial assistance sa mga senior citizens gikan sa kinatibuk-ang P12,000 nga madawat gikan sa siyudad. (BANAT NEWS)