CEBU, Philippines - Nagkadugo nga nalandig sa tambalanan ang usa ka babaye nga aksidenteng naigo sa bala human nahagbong ang armas sa polis sa Sitio Tamban, Western Poblacion, Lungsod sa Poro pasado alas 5 sa nakalabay nga hapon.
Ang biktima giila nga si Concepcion Otadoy Meca, hingkod, samtang ang tag-iya sa armas mao si PO1 Carlo Benedict Otadoy Estrera, 30, pag-umangkon sa biktima.
Si Estrera nadestino sa Poro Police Station apan kasamtangang naka-detailed sa Regional Intelligence Division-7 sa Police Regional Office-7.
Ang hepe sa Poro Police Station, Insp. Andres Alpas, nga nahinabi sa Banat News nagkanayon nga nahitabo ang insidente samtang nagtapok-tapok ang pamilya ug mga paryente sa polis sa usa ka payag-payag.
Samtang naglimpyo ang polis sa iyang service firearms nga glock 17 9mm pistol, aksidente kining natagak sa semento ug nibuto ug ang bala nibanda ug nibagdok sa kilid sa tiyan sa biktima.
Hinoon si Alpas niingon nga luwas na sa delikadong kahimtang ang biktima.
Gumikan kay mga paryente ra sab ang mga nalambigit sa hitabo ug wala gituyo ang hitabo, walay plano ang pamilya sa biktima nga mopasaka og kaso batok sa polis. (BANAT NEWS)