Mga school bus inspeksiyonon
CEBU, Philippines - Ang buhatan sa Land Transportation Franchising and Regulatory Board (LTFRB) 7 mopadala og mga inspectors sa nagkadaiyang pribado ug mga publikong tulunghaan dinhi sa rehiyon alang sa paghimo og pakisusi sa gipadagan nga mga school buses sa ilang tulunghaan.
Si LTFRB 7 Assistant Regional Director Rey Elnar miingon nga ang inspeksyon gitumong alang sa pagsiguro sa kaluwasan sa mga bata nga mosakay niini.
Dugang pa ni Elnar susihon sa mga inspector ang kondisyon sa makina, seat belts, medical kit ug kapabilidad sa drayber.
Si Elnar miingon nga kanunay na hinuon nga gipaubos sa inspection sa ilang mga inspectors ang mga school buses sa mga tulunghaan dinhi sa rehiyon ug kini matigayon sa panahon sa renewal sa rehistro niini.
Samtang ang buhatan sa Land Transportation Office (LTO) 7 mopakatap usab sa ilang mga sakop sa kadalanan sa paghatag og kasiguroan sa mga tinun-an sa ilang pagbukas sa klase sa sunod semana diin ilang gipatuman ang “Balik Eskwela” program. (BANAT NEWS)
- Latest
