CEBU, Philippines - Padayunon gihapon ni Mayor-elect Tomas Osmeña ang paghatag og P50 mil ngadto sa kapolisan nga makapatay og drug personalities.
Sa pakighinabi sa Banat News, mitug-an si Tomas nga padayonon niya ang P50 mil bisan og adunay P5.5 Milyones nga ganti nga ihatag ni President-elect Rodrigo Duterte sa mga polis sa samang kondisyon.
Matud ni Tomas nga wala nila mahisguti ni Duterte ang paghatag og ganti ngadto sa mga kapolisan sa panagkita nila niadtong Miyerkules sa gabii human sa thanksgiving party niini.
Sigon ni Osmeña nga importante gihapon ang paghatag og P50,000 nga kwarta sa mga polis aron makadepensa sila sa ilang mga kaugalingon kun adunay problema nga masugatan sa ilang mga operasyon. Nagtuo si Osmeña nga mas epektibo kini aron motrabaho og maayo ang mga pulis.
“The P50k will remain to protect the policemen. The money will be used to defend themselves,” matud niya.
Sa laing bahin, si acting mayor Margarita “Margot” Osmeña nanawagan sa mga drug lords nga mopahawa na lang sa siyudad tungod daghan ang mogukod kanila. Matud ni Margot nga mosamot kadaghan ang mogukod sa mga drug personalities tungod sa ganti nga gi-impose ni Duterte. (BANAT NEWS)