CEBU, Philippines - Nipahimangno ang usa ka kanhi opisyal sa Bureau of Internal Revenue sa mga opisyal sa gobiyerno batok sa pagpahambog sa dagko nilang bahandi sa ilang Statement of Assets, Liabilities and Networth (SALN).
Matud ni Estrella Martinez, Sugbuanon nga accountant ug abogada kinsa 32 ka tuig nagserbisyo sa BIR, nga dunay buhis nga 32 porsiyento ang bisan pila nga pagsaka sa ilang networth matag tuig.
“SALN can make or break a government official, elected or designated,” matud ni Martinez kinsa naghimo karon sa iyang libro nga, Matuwid Na S.A.L.N.
Sumala pa niya nga ang SALN usa sa dako nga kakuhaan sa gobiyerno og buhis kung hugot nga ipatuman ang Tax Code.
Siya niingon nga kung hugot nga ipatuman ang balaod, hayan daghan usab sa mga opisyal ang mapasakaan og kaso sanglit pipila lang kanila ang nagtug-an sa tinuod nilang bahandi.
Gisaway usab ni Martinez ang mga opisyal nga mobutang sa minilyon nga kantidad sa ilang mga alahas sa SALN.
“I’m surprised why declare millions of jewelries, that’s political suicide,” matud ni Martinez.
Gihimong sanglitanan ni Martinez ang giingong binilyon nga deposito ni incoming President Rodrigo Duterte nga dili lakip sa mabuhisan sanglit donasyon kini alang sa gasto sa politika.
Ang buhisan mao lang ang sobra sa donasyon kung kini itug-an pa ngadto sa BIR. (BANAT NEWS)