Nangapil sa gabii sa kabilin mas daghan

CEBU, Philippines - Nagmalampuson ang laing tuig sa Gabii sa Kabilin o Night of Heritage sa niaging gabii sa upat ka dakbayan sa Metro Cebu nga gilangkuban sa Dakbayan sa Sugbo, Talisay, Mandaue ug Lapu-Lapu.

Nagkadaiyang museum ug heritage sites sa upat ka dakbayan ang gibisita sa mga nisalmot kinsa gilingaw usab sa mga pasundayag sama sa mga karaang binisaya nga kanta ug sayaw.

Gawas sa mga pasundayag, nitanyag usab og libre nga tempura ug puto cheese ang uban nga heritage sites sama sa Iglesia Filipina Independiente Cathedral of Sto Niño sa Barangay Tinago, Dakbayan sa Sugbo.

May libre usab nga sakay sa mga tartanilya gikan sa Archdiocesan Museum of Cebu ug Sugbo Chinese Heritage Museum paingon sa Cebu City Hall.

Lakip sa mga nisalmot mao ang mga langyaw ug batan-on nga buot moila-ila pag-ayo sa kultura ug tradisyon sa mga Sugbuanon.

Si Mae Sanchez sa Ramon Aboitiz Foundation Inc. nagkanayon nga mas daghan ang nisalmot karong tuiga kaysa niaging tuig diin wala na kaayoy tawo nga nisuroy sa mga museum sa pag-abot sa alas 10 sa gabii.

Nibutyag si Sanchez nga mas nidugok ang mga nisalmot karong tuiga tungod sab sa mga bag-ong sites nga gidugang sama sa Cebu Palm Grass Hotel ug Mactan-Cebu International Airport.

Ang Gabii sa Kabilin saulugon matag katapusang Biyernes sa buwan sa Mayo. (BANAT NEWS)