CEBU, Philippines - Anaa karon sa talandugon nga kahimtang ang kapitan sa Brgy. Adlaon human nadisgrasya sa gisakyang motorsiklo niadtong nakalabay nga gabii diha sa iyang barangay.
Ang nalandig karon sa tambalanan mao si Kapitan Elvis Narra kinsa matud pang Brgy. Apas Kapitan Ramil Ayuman, gikan pa namista sa Brgy. Lusaran si Narra dihang kini nadisgrasya.
Matud ni Ayuman nga maayong pagkabunal sa ulo ni Narra ngadto sa bato nga iyang natugpahan human kini nalagpot gikan sa iyang motorsiklo.
Midugang si Ayuman nga nagdulhog kini sa karsada si Narra nga padulong na nga mopauli sa iyang panimalay apan nakaagi kini og bas nga hinungdan sa pagsaliring sa motor niini.
Dali nga gidala si Narra ngadto sa Perpetual Soccour Hospital sa mga tawo nga nakakita kaniya ug talandugon ang kahimtang niini.
Giproseso na ni Association of Barangay Captains chairman Philip Zafra ang financial assistance aron sa pagtabang kaniya. (BANAT NEWS)