R.A. 9344 kinahanglang usbon—PRO7
CEBU, Philippines - Dakong uyon si Chief Superintendent Patrocinio Comendador Jr., direktor sa Police Regional Office-7 sa planong pagpatuman og curfews sa mga minor sa alas- 10 sa gabii ug liquor ban sa ala-una sa kaadlawon.
Kini maoy unang gisugyot sa kampo ni Davao City Mayor Rodrigo Duterte kinsa gikatakdang mao nay mosunod nga pangulo sa nasud base sa partial, unofficial nga eskutenyo sa mga botos.
Apan gitug-an ni Comendador nga labing maayo nga sa dili pa ipatuman ang maong plano mas maayo nga usbon ang Juvenile Justice and Welfare Act (R.A 9344) aron mas epektibo ang maong plano.
Ang maong balaod maoy gibasol sa kapolisan kun nganong nagkadaghan karon ang mga kabataan nga nalambigit sa krimen ilabi na sa ilegal nga drugas tungod kay makalusot sila pirme sa ilang tulubagon sa balaod.
Samtang giangkon ni Comendador nga ikalipay og dako sa kapolisan ug kasundalohan ang plano ni Duterte nga patas-an ilang sweldo aron di na mangurakot.
“Money is not the greatest motivator to the job. It is the commitment or the purpose,” matud pang Comendador.
Sumala pa ni Comendador, moral booster kini sa kapulisan kung madayon apan midugang nga mas maayo og unahon sa kapulisan ang pagserbisyo ayha nga huna-hunaon ang sweldo.
“We welcome kung patas-an among sweldo kinsa may di malipay. Ang mga police wala nay rason para magbinuang. Apan money comes second,” matud pa ni Comendador. (BANAT NEWS)
- Latest
