CEBU, Philippines - Gipahimangnuan sa Department of Health ug Office of the Civil Defense ang mga local health units ug emergency responders nga magbutang og medical stations sa mga eskwelahan atol sa May 9 elections.
Si Baltazar Tribunalo, pangulo sa Provincial Disaster Risk Reduction and Management Office, nagkanayon nga kini base sa memorandum sa OCD nga kinahanglan adunay standby team nga ibutang sa matag presinto tungod sa El Niño.
Matud ni Tribunalo nga ang maong stations ibutang kini sa mga eskwelahan diin adto ipahigayon ang botasyon.
Hinoon mag-agad lang sa kapasidad sa LGU kung pila ka medical stations ang mabutang apan si Tribunalo nagkanayon nga mas maayo nga adunay usa matag eskwelahan.
Moabot sa 800 ka botante sa matag presinto ang gikatakda nga moboto atol sa eleksiyon.
Tungod sa grabeng kainit nunot sa padayon nga epekto sa huwaw, ang presensya sa mga medical personnel ug ingon man emergency responders maoy gikinahanglan aron adunay moresponde panahon kun adunay emerhensiya nga mahitabo.
“Duna lang gyud standby team, nga simbako lang naay ma-heatstroke or naay commotion, dili lang ang safety and security maoy atong matutukan kun dili apil na pud ang humanitarian needs and emergency needs,” matud ni Tribunalo.
Dugang niya nga angay nga tutukan o hatagan og atensyon ang mga vulnerable sectors sama sa mga mabdos, tiguwang ug ingon man persons with disabilities. (BANAT NEWS)