Pusher, 5 nagsuyop naaktohan sa nagpatrolya

CEBU, Philippines - Nadakpan sa akto ang lima ka tawo nga nagsuyop og shabu sa payag-payag sa Tabok, Dakbayan sa Danao alas 6 pasado sa niagi’ng gabii.

Si Police Officer 2 Ronald Gomez sa Danao City Police Station niila sa mga nadakpan nga sila si Ariel Pogoy, 57, taga Lungsod sa Liloan; Glennel  Flores, 24; Joseph Batulan, 36 ug Kevin Maglasang, 24, pulos taga Barangay Poblacion sa mao’ng lungsod. Sila si Police Officer 3 Fiel Restauro ug kaubanan ang nagpatrolya ug sa ila’ng paglabay sa payag nga nahimutangan sa lima ka tawo, ila’ng namatikdan nga nagsuyop kini og shabu.

Ang mga suspek nga nalingaw sa ila’ng gihimo wala nakamatikod sa paghidangat sa mga polis hinungdan sa ila’ng pagkasikop.

Ang lima ka dinakpan nakuhaan og tag-usa ka gagmay nga putos nga shabu ug nakuha usab nila ang mga drug paraphernalia isip mga ebidensiya sa kaso’ng isang-at batok kanila.

Samtang gisignit sa mga sakop sa San Nicolas Police Station ang 47-anyos nga lalaki nga nakuhaan og daghang pinakete’ng shabu sa Magsaysay Street, Suba, Dakbayan sa Sugbo pasado alas 5 sa nakalabay nga hapon.

Ang nadakpan giila nga si Jose Garry Mijares, minyo nga nagpuyo sa mao’ng dapit.

Nadakpan si Mijares diha’ng nagpahigayon og pagpatrolya ang kapolisan nga gipangulohan sa hepe nga si Senior Insp. Chuck Barandog.

Diha’ng girekisa sa mga polis, nakuha gikan ni Mijares ang 60 ka gagmay nga pakete sa gituohang shabu. Gawas sa mga shabu nasakmit usab sa kapolisan ang kapin P500 nga cash nga gituohang halin ni Mijares sa pagpayuhot og shabu.

Gitanggong na sa selda sa San Nicolas Police Station ang suspek nga gikatakda’ng pasakaan og kaso. (BANAT NEWS)