P600 mil shabu sakmit, 5 sikop

CEBU, Philippines - Kapin sa P600 mil nga kantidad sa gituohang shabu ang nasakmit sa mga sakop sa City Anti-Illegal Drugs Special Operations Task Group (CAIDSOTG) sa Cebu City Police Office atol sa duha ka operasyon kagahapon sa buntag ug sa nakalabay nga gabii.

Unang nadakpan si Norman Alducente, 44, sa Sitio Lower Day-as, Barangay Day-as pasado alas 11 sa nakalabay nga gabii.

Ang hepe sa CAIDSOTG, Senior Insp. Eunil Avergonzado, niingon nga ilang napalitan si Alducente og gituohang shabu sa asset sa kapolisan.

Narekober sa mga polis gikan sa dinakpan ang duha ka dagkong putos, usa ka medium-size ug 14 ka gagmay nga pakete sa gituohang shabu nga kantidad og P656,000.

Sa inisyal nga pakisusi sa kapolisan nasayran nga gikan sa alyas Pislat ang supply sa drugas sa suspek ug kini usab karon ang ilang gisubay aron masayran kung asa nagpuyo.

Samtang kagahapon sa buntag nadakpan usab si Christian Gellos, hingkod, sa Salinas Drive Extension, Lahug.

Si Gellos ang gikatahong lumad nga taga Dakbayan sa Davao ug kasamtangang nagpuyo sa siyudad.

Nasikop sa kapolisan si Gellos atol sa buy-bust operation nga gipahigayon.

 Nakuha sa mga operatiba ang usa ka medium-size ug 42 ka gagmay nga pakete sa gituohang shabu.

Samtang duha ka tawo nga nakuhaan og shabu sa checkpoint sa Barangay Binongcalan, Lungsod sa Catmon alas 10 pasado sa buntag sa niaging adlaw.

Si PO2  Leonard Ares sa Catmon  Police Station niila sa nadakpan nga si Rolando Brigoli Montecalvo, 25-anyos, ug Jaymar Coliflores, 20, pulos taga Poblacion, Lungsod sa Sogod.

Matud ni Ares nga ang duha nagsakay og motorsiklo nga nahiagi sa checkpoint ug nisuway unta sa paglikay apan ang mga polis sa unahan ang nidakop sa mga suspek.

Dihang girekisa, nakuha ang tagsa ka gagmay nga pakete sa shabu hinungdan sa ilang pagkasikop.

Sa laing bahin, nadakpan ang manglungkabay sa merkado publiko sa Lungsod sa Consolacion.

Si Police Officer 1 Raymond Lleve sa Consolacion Police Station niila sa nadakpan nga si Andres  Retubado, 30-anyos, taga Caduawan, Tabogon.

Usa ka Teresita Tanjay ang nangayo og panabang sa kapolisan human madiskubrehi nga gilungkab ang iyang tindahan.

Nahanaw sulod sa tindahan sa biktima ang iyang mga alahas ug salapi nga gisulod sa sling bag ug gisulod pa gyud sa cabinet nga gilungkab sa kawatan ug ang P50,000 nga salapi ug kapin sa P20,000 nga mga alahas.

Ang tindahan sa biktima nga adunay CCTV camera ang nakatabang sa kapolisan sa pag-ila kang Retubado nga kanunay masigpatan sa ilang tindahan. (BANAT NEWS)