CEBU, Philippines - Naangol ang usa ka tawo dihang adunay mga armado nga mirapido og bala sa usa ka pamilya didto sa Barangay Malalay, Ronda atol nga nagsaulog sila og birthday.
Dugay nga mireport sa kapolisan ang hingtungdang pamilya tungod kay giatiman pa nila ang samaran nga si Ricky Susas, hingkod ang panuigon nga gidala nila sa ospital sa lungsod sa Argao.
Sa pakisusi nga gihimo sa mga polis nga gipangulohan ni SPO4 Bertodo Mansueto nasayran nga nagsaulog ang pamilya ni Isidra Susas Torres sa birthday sa iyang apo kaniadtong Pebrero 9.
Kalit lang miabot ang tulo ka lalaki nga armado og wala mahibaw-i nga kalibre sa armas ug dayon namusil. Human sa hitabo, dali nangikyas ang mga armado.
Nakabantay ang kapolisan nga kuwang og kooperasyon ang pamilya sa biktima aron mahibaw-an kun kinsa ang mirakrak kanila og mga bala. (BANAT NEWS)