DENR nag-monitor sa campaign posters

CEBU, Philippines - Gi-monitor sa Department of Environment and Natural Resources ang mga campaign materials sa mga kandidato kung wala ba kini gilansang sa mga punoan sa kahoy.

Sigun ni Eddie Llamedo, tigpamaba sa DENR-7, nga wala pa sila’y nadawat nga pormal nga reklamo gikan sa Commission on Elections labot niini apan kini nitataw nga adunay memorandum of agreement tali sa ahensiya, Comelec ug Department of Public Works and Highways labot sa Oplan Baklas.

Matud ni Llamedo nga ang ila’ng gihimo karon mao ang pag-monitor sa mga kandidato ilabi na nga nagsugod na ang kampanya alang sa nasudno’ng posisyon pinaagi usab sa pagpakig-alayon sa Comelec ug Ombudsman.

Ang kandidato nga makalapas sa balaud ipaubos sa administrative proceeding.

Dugang ni Llamedo nga labi’ng bug-at nga silot mao ang pagkapriso sulod sa unom ka buwan ngadto na sa usa ka tuig ug multa nga P500 ngadto na sa P5,000. (BANAT NEWS)