CEBU, Philippines - Nagbantay karon ang Department of Agriculture nga dili makasulod ang New Castle Disease (NCD), usa ka airborne disease diin ang puntariya kadto’ng mga langgam, manok ug pato.
Si Dr. Raul Migriño, veterinarian sa DA-7, nihulagway nga ang mao’ng sakit 90 porsiyento ang mortality rate niini nga nakaapektar sa langgam ug mga poultry products diin ang mataptan niini anaa lang sa 10 porsiyento ang survival rate.
Gipasalig ni Migriño nga bisan og adunay outbreak sa Central Luzon apan dili kini makaapektar sa poultry industry sa Central Visayas diin adunay Animal Quarantine System.
Matag sulod sa mga hayupan sa rehiyon ipaubos sila sa makuti’ng pakisusi sa Bureau of Animal Industry diin wala’y hayupan nga mahimo’ng ibiyahe sa ubang lugar nga dili moagi sa quarantine system.
Ang mao’ng sakit nitumaw gumikan sa kalit nga pag-usab sa temperatura ug panahon diin kung moubos ang immune system sa usa ka poultry product dali na lang kini nga mataptan sa mao’ng sakit.
Aduna’y pamaagi aron malikayan ang sakit ug dili nga dali’ng mataptan ang mga hayupan ug kini mao ang vaccination.
Ang mao’ng sakit dili hinuon makatakod sa mga tawo apan may epekto nga conjunctivitis kun pagpamuwa sa mata.
Gitataw ni Migriño ang sakto’ng pamaagi sa pag-dispose sa manok nga nataptan sa NCD mao ang pagsunog ug paglubong niini aron dili na mokuyanap pa sa uban.
Sigun ni Migriño nga mahimo’ng kan-on ang manok nga dunay NCD apan kinahanglan nga limpyuhan ug lutuon og maayo. (BANAT NEWS)