P6.50 na lang ang pletihan

CEBU, Philippines - Sugod karong Pebrero 8, adlaw’ng Lunes P6.50 na lang ang pletihan sa Public Utility Jeepneys (PUJ) human giaprubahan sa Land Transportation Franchising and Regulatory Board (LTFRB) ang petisyon ni kanhi Cebu City councilor Augustus ‘’Jun’’ Pe nga paubsan ang pletihan.

Kahinumduman ang petisyon ni Pe gisang-at niadtong tuig 2014 apan karon lang kini naaprubahan sa ahensiya.

Gibutyag ni LTFRB-7 Regional Director Reynaldo Elnar, nadawat na nila ang maong resolusyon ug karong adlawa ilaha kining ipapatik sa mga pamantalaan.

Gibutyag ni Winston Ginez, Chairman sa LTFRB usa ka provisional fare reduction ang maong pagkunhod nga nagpasabot temporaryo lang kini ug dili permanente.

Ang unang lima ka kilometro (minimum nga distansya) P6.50 ang pletihan ug P.90 alang sa sunod nga kilometro.

Mimando si Elnar sa mga drayber nga sundon ang maong mando  kay kadtong mareklamo sa pasahero mahimong masilotan pinasikad sa Joint Administrative Order (JAO) 2014-01 nga adunay multa nga P5 mil.

Giawhag usab niya ang mga sumasakay nga magdala og sensilyo (tag .25 sentabos) aron sakto ra ang ilahang iplete.

Tungod usab niini, P5.20 lang ang plete sa mga tinun-an, PWDs ug senior citizens subay sa 20 porsiyento nga diskwentong mando sa balaod.

Apan bisan pa niini, wa kaayo malipay ang pipila ka sumasakay kay matud pa gialang-alang ang .50 nga pagkunhod sa pletihan inay nga diretsong himuong P1.

Usa kanila si Diolendo Bade,  kinsa miingon nga walay kwenta ang pag-ubos sa pletihan kay P7 ra gihapon paninglon sa mga drayber kay mangrason man sila nga wala silay .50 sentabos.

Sumala pa ni Bade, mas maayo unta kun gidiretso kini og P6 aron walay gubot ug samok tali sa mga pasahero ug drayber kay aduna man gyuy mga pasahero mangyawat sa .50.

Si Joseph Borg sa iyang bahin PUJ driver nga magbiyahian sa Pardo nibutyag nga walay problema niya kung gipakubsan ang pletehan kay gipaubsan man sa ilang operator ang iyang abangan.  (BANAT NEWS)