Duha ka gwardiya sa MCIA gipamusil

CEBU, Philippines - Duha ka gwardiya  ang gipusil sa mga wala mailhing lalaki nga nagsakay og motorsiklo alas 12:40 kagahapon sa kaadlawon sa entrada sa Mactan-Cebu International Airport, sa Airport Road, Brgy. Pusok sa Dakbayan sa Lapu-Lapu.

Ang mga nabiktima sa pagpamusil mao sila si Samuel Lamoste, 36, ug si Roweno Moncada, 23, pulos sakop sa VDS Security Agency.

Sa pakisusi ni Senior Police Officer 2 Manolito Abellanosa, imbestigador sa Lapu-Lapu City Police Office -Homicide Section gikatahong gipahunong sa mga biktima ang duha ka mga lalaking nagmotorsiklo atol sa security check.

Apan gikatahong wala mohunong ang duha ka lalaking nagmotor nga wala magsuot og helmet.

Daling giradyohan ni Lamoste ug Moncada ang ikaduhang grupo sa security checkpoint apan midiretso gihapon ang mga gikatahapan.

"Ang suspek milabay (atbang) sa international ug domestic departure area dayon mibalik sa agi kung asa nahimutang ang duha ka security guards," matud ni Abellanosa sa Banat News.

Si Aviation Security Group Chief Melvin Gayotin miingon nga ilahang gipugngan ang mga suspetsado human nasayran nga walay plate number ang ilang gisakyang kolor green nga motorsiklo ug pulos wala nagsuot og         helmet.

"They refused (to stop) and sped off towards the departure area instead. Upon reaching the control or final check point area, (the alleged suspects) maneuver a U-turn and drove against the traffic flow, heading back to PAGASA gate," dugang ni Gayotin.

 Dugang ni Gayotin, gibalikan sa mga suspetsado ang mga security guards sa maong entrada ug gipamusil kini. Si Lamoste naigo sa tuong abaga samtang si Moncada naigo sa tuong bahin sa paa nga milapos sa iyang bugan.

"One of the guard was able to fire back but still both suspects managed to escape," matud ni Gayotin. Gidala sa Mactan Doctor's Hospital ang duha.

Ang kapolisan padayon pa karon sa ilang gihimong imbestigasyon sa maong insidente ug kun unsay motibo sa mga gikatahapan. (BANAT NEWS)