Kapitan ug treasurer sa Sambag 1 gireklamo sa Ombudsman

CEBU, Philippines - Gireklamo ang kapitan ug kanhi treasurer sa Barangay Sambag 1 sa unom ka konsehal sa buhatan sa Ombudsman-Visayas sa giingong pagtuyo paglangay nga ma-encash sa bangko ang ila’ng tseke alang sa sweldo ug ubang gastohan sa barangay.

Ang unom ka konsehal niawhag sa Ombudsman nga imbestigahon sila si Kapitan Lemar Alcover ug kanhi treasurer Connie Abella ug kun may makita nga basehanan nga sila nakahimo og kasaypanan, pahamtangan sila og silot.

Ang mga konsehal nga nireklamo mao sila si Jaime Lacuña, Nestor Tallo, Ramon Rama, Jaime Bacus, Khristie Ann Cañares ug Lyza Khrizelle Bacaltos kinsa nibutyag nga daku na kaayo ang epekto nga dili ma-encash ang ila’ng tseke sa Land Bank of the Philippines.

Pagka-karon nga wala na sila tuguti nga maka-encash sa tseke didto sa Land Bank, naputlan na sa kuryente ang barangay hall ingon man wala na maswelduhi ang mga opisyal ug mga kawani sa barangay.

Matud sa mga konsehal nga ang Commission on Audit ang niawhag sa bangko nga pugngan ang pag-encash sa mga tseke sa Barangay Sambag 1 tungod kay si Alcover wala moduso og Punong Barangay Certification (PBC).

Ang maong dokumento gikinahanglan sa COA aron pagmatuod nga lihitimo ang tanang gastohanan sa barangay pinaagi sa pagpirma sa kapitan.

Ang mga nireklamong konsehal niingon nga ang COA dugay ra nga niawhag ni Alcover nga moduso og PBC apan ang ilang kapitan ingon man ang treasurer kaniadto wala mo-isyu niini aron pagmatuod unta nga ang paggasto sa P5.7 milyones nila nga budget sa niaging tuig nahasubay sa lagda. Matud sa mga konsehal nga ang pagpabaya sa katungdanan sa ilang kapitan ug sa kanhi treasurer kalapasan sa lagda sa Anti-Graft and Corrupt Practices Act. (BANAT NEWS)