Sikyu gipatay, armas gikawat

CEBU, Philippines – Usa ka 46-anyos nga security guard ang gipusil sa wala mailhing tawo diha sa Sitio Sta. Ana, Brgy. Pusok, Dakbayan sa Lapu-Lapu sa miaging Biyernes sa kaadlawon.

Ang guwardiya mao si David Opsiman, sakop sa Janthro Security Agency, ang gipusil sa alas 4:55 sa buntag niadtong adlaw nga Biyernes.

Sumala pa ni Police Officer 3 Luisito Ernie, imbestigador sa Lapu-Lapu City Police Office-Homicide nga on-duty kaniadtong adlawa si Opsiman sugod sa gabii sa Huwebes sa usa ka kompanya sa Brgy. Ibo.

Apan sa dihang niabot ang karelibo sa biktima nga si Lyndon Icoy, alas-3 sa kaadlawon nakita na lang kini nga nagkadugo. Daling mitawag si Icoy sa ilahang opisina ug gipahibalo ang nahitabo ni Opsiman. Nasuta nga aduna kini samad pinusilan sa liog.

Nasayran usab nga wala na ang .9 mm pistol nga giisyu ngadto sa biktima ug gituohang gikawat kini sa mamumuno.

Gidala ni Icoy si Opsiman sa Lapu-Lapu City District Hospital apan gideklara nga dead on arrival.

Narekober sa kapolisan ang lima ka kabhang nga gituohang gikan sa .45 caliber pistol, lakip na ang cellphone sa biktima ug ang mga identification cards niini. Wala pa matino sa kapolisan kung si kinsa ang nagpusil-patay kang Opsiman apan sa ilahang pakisusi aduna kini nakalalis pipila ka adlaw sa wala pa nahitabo ang insidente.

Padayon na karong gisubay sa kapolisan kun si kinsa ang maong gikalalis sa biktima. – /EIM) (BANAT NEWS)