100 nikanselar sa Suroy-Suroy

CEBU, Philippines – Katunga sa mga nagparehistro nga guests sa Suroy-Suroy Sugbo ang nagpakanselar tungod kay komplikado ang ila’ng oras matud ni Bise Gobernador Agnes Magpale, chairperson sa committee on tourism sa probinsiya. Si Magpale nibutyag kagahapon nga may 200 ka guests unta ang mokuyog apan ang 100 niini nikanselar.

Apan matud niya nga dili na tibuok nga bayad ang ila’ng mauli sanglit kuhaan nila kini og pipila ka porsyento tungod kay nakapa-reserba na sila og mga resorts.

Ang bayad sa matag guest sa package rates nagkantidad gikan sa P7,000 ngadto sa P14,000. Gibutyag ni Magpale nga ubay-ubay na sila og nabalibaran nga buot unta mokuyog tungod kay fully-booked na sila. Karong adlawa magsugod ang Suroy-Suroy sa habagatang bahin sa probinsiya.

Hinuon giklaro ni Magpale nga ang pagkanselar sa mao’ng mga guests wala’y kalabutan ang bangi sa agianan sa Mainit Spring sa Lungsod sa Malabuyoc tali sa mga tag-iya sa luna ug sa lokal nga kagamhanan hinungdan nga wala kini giapil sa mga tourist sites nga bisitahon.

Dugang ni Magpale nga nakomplikado ang schedule sa nahisgutang mga guests tungod sa kalihukan usab sa International Eucharistic Congress sunod semana. – /GMR) (BANAT NEWS)