CEBU, Philippines - Nadakpan sa pagpangronda sa kapolisan ang usa ka barangay konsehal sa Santo Rosario, Dakbayan sa Bogo ug nasakmit ang mokabat sa P200,000 nga kantidad nga shabu.
Si Police Officer 1 Moises Conanan sa Bogo City Police Station niila sa nadakpan nga si Jose Rey Ocampo, 61-anyos.
Ang hepe nga si Police Superintendent Richard Olivar, ang nangulo sa pagpangronda pinasikad sa search warrant nga giisyu ni Judge Antonio Maringumen sa Branch 61 sa Regional Trial Court sa mao’ng dakbayan.
Nasakmit sa pagpangronda ang duha ka dagku’ng pakete sa shabu nga motimbang og 18 gramos ug kantidad sa P200 mil base sa presyo sa Dangerous Drugs Board.
Matud ni Conanan nga dugay na nga panahon nga ila’ng nasayran ang pagkalambigit sa mao’ng barangay opisyal sa ilegal nga kalihukan.
Samtang mokabat usab sa 27.08 gramo’ng shabu nga kantidad og P328 mil ang nasakmit gikan sa usa ka babaye’ng pusher nga niresulta usab sa pagkasikop sa iya’ng kustomer sa Lungsod sa Consolacion.
Ang nadakpan mao si Cindy Quiñones Avila, 26- anyos, ug iya’ng kustomer nga si Joseph Roxas Castillano, 37.
Nasakmit kang Castillano ang mga tinfoil sanglit wala mahinayon ang pagpalit og shabu gikan sa mao’ng pusher. - /GMR (BANAT NEWS)