CEBU, Philippines - Kapin sa 400 ang na-isyuhan og citation human nasakpi sa Cebu City Environmental Sanitation and Enhancement Team (CESET) nga nagpataka og pangihi ug panigarilyo sa may Fuente Osmeña Rotunda atol sa Sinulog.
Matud sa pangulo sa CESET, Grace Luardo, nga sugod pa niadto’ng Enero 10 nila’ng gi-istrikto sa CESET ang pagpangdakop sa mga malapason sa ordinansa.
May mga booth usab nga gipamadlong sa CESET kagahapon tungod sa kahugaw ug daghang basura sa ila’ng dapit. Nipahimangno usab ang CESET labot sa pagpabiling limpyo ug ilabay sa sakto’ng basurahan ang mga basura ilabi na sa mga business establishments nga sa carousel route sa Sinulog.
Samtang ang mga koral sa mga tanum sa center island sa Osmeña Boulevard ang nangadaut tungod kay wala kini nakapugong sa baga’ng duot sa katawhan. (Sheriza Mae R. Uy/GMR)
Mga artista giatngan sa mga nanan-aw sa Sinulog
Sama sa mga niagi’ng Sinulog Grand Parade giatngan gihapon sa katawhan ilabina sa mga batan-on ang mga artista nga sakay sa nagkalain-laing floats.
Si Angeli Reyes nag-atang sa dalan P.del Rosario nga pwerte’ng lukso sa pagkakita sa actor nga si Ejay Falcon ug Miss Earth 2013 Air Stephany Stefanowitz nga nagsakay sa float sa Placenta.
Tug-an pa ni Reyes nga tagsa ra siya kakita og artista tungod kay sa mga nilabay nga Sinulog dili siya maka-timing tungod sa kadaghang tawo.
Nakita usab sila si Maja Salvador, Coco Martin, Mario Mortel, Melai Contiveros, Ogie Alcasid, Richard Gutierrez ug uban pa.
Samtang ang Cebu City command center nakatala og siyam nga gitabang atol sa Sinulog Grand Parade sa nagkalain-laing mga dapit.
Kini tungod kay nakuyapan sa kainit ug kagutom sa dugay nga pag-atang sa carousel route. - /GMR (BANAT NEWS)