CEBU, Philippines – Patay ang 61-anyos nga lalaki nga nalatayan sa bus samtang laing usa ang naangol sa Barangay Ibo, Dakbayan sa Toledo sa nakalabay’ng adlaw.
Giila ang nakalas nga si Glenn Gorres, taga Sitio Campo, Poblacion, Lungsod sa Pinamungajan samtang ang naangol mao si Vivencio Gepitulan, 71, taga Barangay Awihao, Toledo. Matud ni Police Officer 2 Romeo Jaranilla sa Toledo City Traffic Section nga sakay sa iya’ng motor si Gorres diha’ng ni-overtake kini sa gisundan nga Ceres bus nga gimaneho ni Eruel Reyes, 48-anyos, nga paingon unta sa Pinamungajan.
Diha’ng ni-overtake si Gorres adunay kasugat nga traysikol hinungdan nga nilikay kini ug nagpahinay sa pagpadagan apan nabag-iran ang iyang tuo nga braso sa nagsunod nga bus.
Nawad-an sa balanse ang drayber ug nagkapakung sa motorsiklo nga gimaneho ni Gepitulan.
Nalabay ang mga biktima apan si Gorres ang nalagpot sa ilawom sa bus hinungdan nga nalatayan kini ug maayo’ng pagkabuak sa ulo samtang si Gepitulan ang dali’ng gidala sa Toledo City Hospital.
Ang drayber sa bus gikustodiya sa Toledo City Traffic Section alang sa dugang imbestigasyon. – /GMR) (BANAT NEWS)