Full force ang enforcers sa CCTO karong Enero
CEBU, Philippines – Dili tugutan sa Cebu City Transportation Office (CCTO) nga maka-day off ug makabakasyon ang tanan sakop sa City Traffic Office alang sa pagpangandam sa umaabot nga Sinulog 2016 ug International Eucharistic Congress (IEC) 2016 nga pulos mahitabo karong bulana.
Matud ni CCTO Executive Director Atty. Rey Gealon nga sugod Enero 7 hangtod 31 way tugotang personnel nga makabiya sa ilang trabaho tungod kay napanglantawang kinahanglang tabangan gyud ang pagmando sa trapiko ning mga panahona.
Dinhi sa Sugbo gipahigayon ang IEC 2016 nga usa ka relihiyosong kalihokan nga pagatambungan og nagkadaiyang langyaw nga delegado ug lokal nga relihiyosong pundok gikan sa nagkalainlaing rehiyon.
Tungod niini, gipaabot nga adunay masinating mga problema sa trapiko nga kinahanglang atimanon ang dakbayan sa maong mga adlaw.
Nagtuo si Gealon nga modoble unya ang tawo nga mosalmot sa mga kalihokan karong buwana tungod sa duha ka dakong events.
Tug-an pa ni Gealon nga adunay pagahimuon nga pagsira sa kadalanan nga maapektohan sa Sinulog ug IEC.
Samtang nagpahigayon og truck ban ang CCTO sugod alas 10 sa gabii hangtud sa alas 5 sa buntag diha sa mga kadalanan sa siyudad atol sa Sinulog.
Gawas niini dili usab tugotan sa CCTO ang pagpaagi og mga heavy equipment diha sa tunnel sa South Road Properties (SRP). – /EIM) (BANAT NEWS)
- Latest
