Masuso gikawat diha sa VSMMC

CEBU, Philippines – Gipangita karon sa mga otoridad ang usa ka babayeng nagpakaaron-ingnong nurse sa Vicente Sotto Memorial Medical Center nga midagit sa duha pa lang ka adlaw nga masuso nga lalaki kagahapong adlawa.

Ang pagdagit sa bata nakuhaan pa sa closed circuit television camera sa tambalanan apan walay bisan usa ka gwardiya ang nakabantay niini.

Ang masuso gihimugso ni Jayvee Celadenio taga Brgy. Calajoan, Lungsod sa Minglanilla, niadtong Enero 2, alas 9:59 sa buntag ug ginganlan nila kini og Prince Niño.

Sa interbyu sa CCTN Channel 47 sa amahan sa bata nga si Jonathan Celadenio, 27, kini miingon nga kagahapon sa udto, samtang busy ang mga tinun-an nga mga nursing interns adunay usa ka babaye nga nag-uniporme og nurse nga nagtabon og surgical mask apan walay name plate ang miduol kanila diha sa Child Survival Area. Nangutana kini kun nabakunahan na ang bata alang sa anti-dengue ug sa dihang gitubag kini ni Jayvee nga wala pa, giaghat sila niini nga dad-on ang bata sa laboratory room ug pakoyugon ang inahan.

Ang maong babaye matud pa ila pud nabantayan nga niduol sa katupad nilang pasyente ug nangayo og ihi sa pasyente.

Dugang ni Jonathan dihang gidala ang ilang anak sa maong babaye uban ang iyang asawa iyaha usab giasikaso ang ilang PhilHealth benefits.

Ang inahan sa masuso gipabilin ra sa gawas sa laboratory room  sa babaye ug wa usab kini makabantay nga nigawas na kini kay niadtong tungora adunay kaestoryang kaila ang ginang.

Apan human sa 15 minutos nga pagpaabot nahibulong si Jayvee nganong wala mogawas ang nurse maong nangutana kini sa staff sa laboratory room ug didto gitug-anan kini nga wala silay giatimang masuso nga ginganlan og Prince Niño. Base sa kuha sa CCTV camera, ang babaye nga pution og pamanit niagi sa gamay’ng agianan, gikan sa laboratoryo padulong sa billing section, lahos sa cashiers area, ug ngadto sa exit sa trauma area nga mao ang exit alang lang sa mga empleyado. Base sa kuha sa CCTV nahitabo kini alas 12:01 sa udto.

Si Jonathan nagpakiluoy karon sa nikuha sa iyang anak nga iuli na kini ngadto nila gumikan kay dili lalim ang ilang gibating kabalaka.

Ang pangulo sa Vicente Sotto Memorial Medical Center (VSMMC) Dr. Gerardo Aquino nanawagan sa publiko nga motawag sa numero 0932-5513822 ug pangitaon ang ilang public information officer nga si Nonoy Mongaya  ug ipahibalo kun aduna silay impormasyon.

Si Mongaya mikompirmar nga dili empleyado sa VSMMC ang maong babaye nga nakita sa CCTV nga midagit sa bata.

Si Dr. Aquino misaad nga mohatag sila og pahalipay niadtong tawo nga makatudlo kinsa ang maong suspek.

Samtang ang officer-in-charge sa Fuente Police Station Sr. Insp. Randy Caballes miingon mopahigayon sila og lawom nga imbestigasyon sa maong insidente.

Ipasusi niini kun wala bay kontra ang pamilya sa ilang lugar nga nagplano nga hatagan ang pamilya og dakong problema.

Mao pa kini ang labing unang insidente sa VSMMC nga dunay gikawat nga bata.

Subli na usab subayon sa kapolisan kun dunay lapso sa seguridad sa maong tambalanan tungod kay gawas pa sa maong insidente, aduna nay duha ka higayon nga gikawatan ang maong tambalanan sa miaging tuig bisan sa kaestrikto sa mga gwardiya niini ngadto sa mga sakop sa kapolisan ug sa media.

Sa pagkutlo ning balita wala pa makuhai sa ilang habig ang security agency nga maoy nagbantay sa tambalanan.

Ang pamilya midangop na usab sa National Bureau of Investigation aron magpatabang sa nahitabo sa ilang anak. – /EIM) (BANAT NEWS)