CEBU, Philippines – Nisamot karon ang guna sa dili maayong relasyon tali sa mga Middle Eastern powerhouse nga Saudi Arabia ug Iran human sa pagbitay sa Saudi sa usa ka Shiite cleric.
Ang Iran usa ka Shiite Muslim samtang ang Saudi Sunni Muslim, duha ka mga managribal nga paksyon sa Islam didto sa maong rehiyon. Ang panagribal sa duha ka paksyon sa mga Muslim maoy usa sa gitumbok nga hinungdan sa walay kahumanang kagubot sa maong dapit.
Apan mas nidako ang problema dihang gisulong ug gisunog sa mga nagprotestang Iranians ang embahada sa Saudi didto sa Tehran human mipagawas og bahad ang supremo sa Iran, Ayatollah Ali Khamenei, nga bayran og mahal sa Saudi ang pagbitay kang Sheikh Nimr al-Nimr.
Si al-Nimr nga usa ka Shiite gipasanginlan sa gobiyerno sa Saudi nga nagtisok og dili maayong pagtulon-an sa Saudi ug nisuporta sa terorismo, pasangil nga gihimakak sa Iran.
Apan niadtong Domingo, human sa nahitabo sa embahada sa Saudi didto sa Tehran, ang Saudi mipalayas sa tanang mga Iranian diplomatic personnel sud sa 48 oras diha sa ilang nasud samtang ang tanang Saudi diplomats didto sa Iran, gimandoan sa pagpauli.
Ang maong mass execution gihulagway nga pagpakita sa bag-ong hari nga si King Salman sa iyang kontrol sa gingharian sa Saudi, si Salman nangusog usab sa pakiggubat sa mga rebeldeng Shiites sa silingang nasud nga Yemen usa ka Sunni Muslim.
Ang panagbingkil sa duha ka nasud gipaabot nga makapasaka sa kalibotanong presyo sa petrolyo sa mosunod nga mga adlaw. (AP/EIM) (BANAT NEWS)