CEBU, Philippines – Si suspended Cebu City Mayor Michael Rama miawhag sa kadagkoan sa Department of Public Works and Highways nga tagdon nila ang kapilegro sa mga motorista tungod sa mga kahoy nga anaa na sa taliwala sa pipila ka karsada.
Matud ni Mayor Rama nga dili angay’ng maghuwat pa ang kadagkoan sa DPWH nga adunay kinabuhi nga makalas tungod sa aksidente, usa pa sila molihok aron paghatag og pagtagad sa problema.
Tungod sa pagpalapad sa pipila ka karsada dinhi sa dakbayan, kadtong mga kahoy nga kaniadto diha ra sa daplin, nahimutang na karon sa taliwala sa karsada ug makuyaw kaayo nga madasmagan sa mga sakyanan, ilabi na sa gabii.
Apil niining maong mga kahoy anaa mahimutang sa taliwala gyud sa Veterans Drive dapit sa Sitio Maaslom sa Barangay Busay nga wala gani butangi sa DPWH ug reflectorized paint aron makita dayon sa mga motorista panahon sa kagabhion.
Ang ubay-ubay nga mga punoan sa Acacia nga kaniadto diha ra daplin sa karsada, karon anaa na mahimutang sa taliwala, human ang karsada kilid sa Kapitolyo gipalapdan sa DPWH.
Ang DPWH buot unta nga mokuha niining maong mga punoan sa kahoy aron mabahin nila pag-ayo ang karsada alang sa duha ka “lane” apan nagpadiki-diki paghatag og pagtugot ang kadagkoan sa Department of Environment and Natural Resources.
Matud ni Rama nga bisan gani ang mga kahoy nga karon nakababag na sa gimugna nga aseras diha sa Salinas Drive kilid sa rehiyonal nga buhatan sa Technical Education Skills and Development Authority (TESDA) angay na nga kuhaon, apan ang DENR wala pa mohatag og pagtugot.
Si Rama miingon nga kinahanglan nga ang kadagkoan sa DPWH makigtambayayong sa DENR ug ubang ahensya sa kagamhanan aron makuha na sa karsada ang mga butang nga makahatag og risgo sa mga motorista. (BANAT NEWS)