Dugang kaso gipasaka batok 10 konsehal

CEBU, Philippines – Nag-atubang na og dugang kaso ang mga konsehal sa Dakbayan sa Sugbo kabahin sa paglangay-langay gihapon nila pagtuki ug pagpasar sa Supplemental Budget No. 1 nga gikinahanglan kaayo sa siyudad aron mapatuman ang mga proyekto ug programa sa mayor. Usa ka Evelyn Montes, residente sa Sitio San Miguel, Bry. Apas, Cebu City, nagkanayon nga nakalapas ang mga konsehal sa Anti-graft and Corrupt Practices Act,  Code of Conduct and Ethical Standards for Public Officials and Employees, oppression, misconduct in office, gross negligence, ug dereliction of duty and abuse of authority under Section 60 of the Local Government Code ang mga konsehales sa pagsuspendi sa deliberasyon sa SB 1 nga walay makatarunganong rason.

Ang mga gikiha mao sila si Konsehal Margarita Osmeña, acting vice mayor Nestor Archival, Sr., Lea Japson, Mary Ann Delos Santos, Sisinio Andales, Alvin Arcilla, Roberto Cabarrubias, Ma. Nida Cabrera, Alvin Dizon ug Eugenio Gabuya, Jr. sa buhatan sa Ombudsman-Visayas.

Matud ni Montes nga ang pagsuspendi sa deliberasyon ug botasyon sa SB-1 daw mi- hostage sa prepayment sa loan sa siyudad ngadto sa Japan International Cooperating Agency (JICA) sa pag-ugmad sa Cebu South Reclamation Project, ibayad sa tipping fees sa basura ug alang sa 2015 productivity enhancement incentive (PEI) sa mga kawani, ug uban pa.

Matud pa sa iyang reklamo, ang paglangay-langay sa SB-1 nakaapektar sa serbisyo nga alang sa mga konstituwente sa siyudad sa Sugbo ug sa pangagamhanan sa dakbayan.

Ang rason sa mga gipangkiha nga konsehal nga pulos sakop sa Bando Osmeña Pundok Kauswagan (BOPK), di mahimong gamiton ang halin sa SRP kay di pa final ang hukom sa korte nga nag-ingong way rason aron di magamit sa siyudad ang kwartang halin sa SRP.

Nasayran nga gibasura na sa korte ang mga gipasakang kaso sa usa ka Atty. Romulo Torres nga nagkwestyon sa paggamit sa halin sa SRP ingon man sa paagi sa pagbaligya niini, apan misang-at siya og apelar karon ngadto sa Court of Appeals sa kaso.

Niadtong Martes, si Atty. Jose Daluz III, kanhi konsehal sa siyudad mipasaka og kasong civil sa korte batok sa city council tungod gihapon sa maong paglangaylangay sa SB-1. – /EIM) (BANAT NEWS)