CEBU, Philippines – Patay ang usa ka empleyado sa munisipyo sa Lungsod sa Tabogon dihang kini nagmaneho nga hubog sa iyang motorsiklo gikan nitambong sa Christmas party sa ila’ng departamento pasado alas 5 sa nakalabay nga hapon.
Giharos pa ang duha ka motorsiklo nga gikasugat lakip ang upat ka tawo nga naglakaw sa dalan sa Barangay Piyo.
Patay sa insidente si Emmerson Cardiño, 23, job order employee sa Lungsod sa Tabogon.
Samtang napulo usab ka tawo ang naangol diin lakip na ang iyang kapuyo nga iyang backrider nga si Ranie Saladaga, 23.
Nalandig usab sa tambalanan ang magtiayon nga sila si Jose Pogio, 55, ug Epifania Pogio, 50, nga sakay sa usa ka motorsiklo, Lodenito Comedido, 45, drayber sa habal-habal ug iyang duha ka pasahero nga sila si Felniel Lobiano ug iyang anak nga si Cyrell, 12.
Laing upat usab ka tawo ang naharos daplin sa dalan nga sila si Roselyn Panugaling, 27; Leah Booc, 30, kinsa usa ka maestro, Aldrina Booc, 18, ug Annalee Abelong, 35.
Matud ni Police Officer 3 Epifanio Comedido Jr., imbestigador sa Tabogon Police nga nahinabi sa Banat News, nga samtang paingon na mopauli si Cardiño kauban ang iyang kapuyo kalit lang nawad-an og kontrol si Cardiño dihang niagi kini sa kurbadang bahin sa karsada. Tayming usab nga gikatagbo ang duha ka motorsiklo ug didto nisampak.
Tungod sa kakusog sa bangga lakip sa naharos ang upat ka babaye daplin sa dalan nga igo lang nanglaag sa mao’ng lungsod.
Sumala pa ni Comedido nga maayong pagkaukab sa ulo ni Cardiño human nabunal sa karsada kay wala usab nag-helmet.
Dali nga gipangdala sa Sogod District Hospital ang mga biktima apan gideklara nga dead on arrival si Cardiño samtang ang iyang kapuyo ug ang sakay sa duha ka motorsiklo ang gipangdala usab sa tambalanan sa Siyudad sa Sugbo gumikan sa grabeng angol nga naangkon.
Ang upat ka babaye nga naharos ang nakagawas ra sa hospital human igo lang nakaangkon og diyutay nga angol.
Si Comedido nibutyag nga iya na lang giingnan ang mga biktima nga mag-iyahay na lang una sila og gasto sa tambalanan kay namatay man si Cardiño ug kritikal ang kapuyo. – /GMR) (BANAT NEWS)