CEBU, Philippines – Usa ka lalaki nalambigit sa ginadiling drugas ang gidakop sa kapolisan kagahapon sa buntag atol sa buy-bust operation sa Sitio Bagumbayan, Barangay Mactan, Dakbayan sa Lapu-Lapu.
Giila ang suspetsado nga si Joel Paquibot, residente sa maong dapit ang nasikop sa Lapu-Lapu City Police Office – City Intelligence Branch nga gipangulohan ni Police Chief Inspector Mark Gifter Sucalit sa alas 6:20 sa buntag.
Nagkanayon si Sucalit nga nakumpiska nila ang 19 ka gagmay’ng pakete ug duha ka medium sized nga mga gituhuang shabu gikan ni Paquibot nga nagkantidad og P128, 620. Pasakaan og kaso si Paquibot ubos sa Republic Act 9165 kon Comprehensive Dangerous Drugs Act of 2002.
Nasikop ang pito ka mga tawo nga naaktohan sa kapolisan nga nagsuyop og shabu ala 1 pasado ang takna sa hapon niadtong miaging adlaw sa Maslog, Dakbayan sa Danao.
Si Police Officer 1 Ritchie Guilleran miila sa mga nadakpan nga mao sila si Manuel Gestopa, 32, Eric Porlkas, 35, Carlito Rabor, 38, Zaldy Pareja, 54, Ian Sotero, 38, pulos taga Lungsod sa Compostela, Ryan Villarta, 25, ug Marlon Fruto, 39, pulos taga Dakbayan sa Danao.
Ang Danao City Police Station nakadawat sila og taho kalabot sa gikatahong grupo sa mga lalaki nga nagduwa og hantak sa nahisgotang lugar maong ilaha kining gisusi apan sa ilang pag-abot nag-iyahay pagpanagan pahilayo sa maong lugar.
Atol sa ilang pagpangita, nalabyan nila ang mga suspek hinungdan sa ilang pagkasikop ug nasakmit usab nila ang tagsa ka gagmay nga paketeng shabu. – /EIM) (BANAT NEWS)