Konseho sa Talisay kombinsihon nga 2016 budget ipasar
CEBU, Philippines – Paningkamutan ni Bise Mayor Romeo Villarante sa Siyudad sa Talisay nga iya’ng makombinsi ang konseho nga mapasar gyud ang 2016 budget inay reenacted budget lang ang ila’ng tumanon.
Si Mayor Johnny de los Reyes niduso sa 2016 annual budget niadtong Oktubre 15 sa kantidad nga kapin sa P800 milyones nga naglakip sa nagkadaiyang proyekto, sweldo sa mga job order nga kawani, intelligence fund, peace and order ug uban pa.
Ang mayor nanghinaut nga maaprobahan na kini sa konseho sa labi’ng dali nga panahon aron magamit sunod tuig.
Mayoriya sa mga sakop sa konseho sakop sa Alayon Party nga kaatbang sa politika sa mayor. Si Villarante niingon nga iya’ng suwayan pagkombinsir ang mayoriya aron aduna gyud sila’y mapalabang nga budget.
Iya’ng gipasabot nga mopasar gyud sila og budget tungod kay dili na man ang mayor ang makagamit niini kun dili ang modaug sa umaabot eleksiyon.
Mag-atbang sa pagka-mayor mao sila si JVR, Villarante ug kanhi kongresista Eduardo Gullas.
Matud ni Villarante nga dili angay mahadlok ang konseho nga magamit sa mayor ang budget tungod kay dili pa man kini mapalabang unya sa Pebrero kanus-a magsugod na ang election period nga dili na mahimo’ng makapatuman og mga proyekto.
Hinuon gitataw ni Villarante nga ila pa kini’ng tun-an og maayo ug tagsa-tagsaon sa pagsusi kun wala ba’y gipasukip nga budget nga wala na kinahanglana o ba kaha budget alang sa daghan na usab kaayo’ng job order employee.
Nidugang ang bise mayor nga sa Enero ug hangtud nga wala pa’y budget nga mapalabang, mahimo nga maggamit ang reenacted budget. – /GMR) (BANAT NEWS)
- Latest
