CEBU, Philippines – Namuok ug nisampak sa likod sa usa ka guwardiya ang Indian pana human kini gituohang gipareglahan samtang nag-atang og kasakyan nga jeep sa dalan P. del Rosario, Dakbayan sa Sugbo pasado alas 6 sa nakalabay nga hapon.
Ang biktima giila nga si Jeben Magno, 19, nagpuyo sa mao’ng dapit.
Kauban sa biktima atol sa hitabo ang iya’ng ig-agaw nga si Aljun Armenion, 23, construction worker nga nagpuyo usab sa mao’ng dapit.
Matud ni Police Officer 3 Jerry Genelaso, imbestigador sa homicide section sa Cebu City Police Office, nga nahinabi sa Banat News nga duna na sila’y pangalan sa posible’ng suspek sa krimen nga giila’ng usa ka bugoy-bugoy ug hilig mamaregla.
Sumala pa ni Genelaso nga lagmit igo lang na tripingan ang biktima ug sa diha’ng paingon na kini mokapyot sa jeep didto usab kini gibirahan og pana.
Nilubong sa kilid sa likod sa biktima ang punyal sa pana human nabantayan sa biktima nga naminhud ang iya’ng likod nga bahin ug bugtong ikog nga straw na lang sa pana ang nakita sa likod.
Nanaug sa jeep ug gisakay sa taxi ang biktima paingon sa Vicente Sotto Memorial Medical Center (VSMMC).
Si Genelaso niingon nga ila na’ng gikuhaan og affidavit ang ila’ng nakuha nga testigos sa krimen aron mapasakaan og kaso ang responsable. – /GMR) (BANAT NEWS)