CEBU, Philippines - Ablihan pag-usab sa Dakbayan sa Lapu-Lapu ang Kiddie Land alang sa mga bata isip pagsaulog sa Pasko.
Kini ang gibutyag ni Frances Nicole Balao, executive assistant sa City Tourism Office.
Mokabat sa 20,000 ka bata gikan sa mga barangay sa siyudad ug sa Isla sa Olango ang gilauman modagsa sa lugar.
Una’ng ipahigayon ang kalihukan sa Isla sa Olango karong Sabado hangtud Domingo gikan sa alas 9 sa buntag hangtud alas 9 sa gabii sa mini-Hoopsdome sa isla.
Mga nagkalain-laing inflatable rides, Lego Land, mga mascots ug magic shows, ilabi na ang food concessionaires ang sagad makit-an sa Kiddie Land nga matud ni Balao segurado nga malingaw ang mga bata sa kalihukan.
Sa laing bahin, nagkanayon si Mayor Paz Radaza nga P1.5 milyones ang budget alang sa pagpahigayon sa ikatulo’ng tuig sa Kiddie Land.
Dugang ni Balao nga 5 ngadto sa 15-anyos nga bata ang dawaton sa Kiddie Land apan mo-accommodate sab sila og mga ginikanan o guardian alang sa pagbantay sa mga bata.
Ang mga barangay buses ang mahimo’ng transportasyon sa mga bata ug matud ni Radaza ang kagamhanan sa siyudad ang moabaga sa plete sa mga bata padulong sa Olango.
Kung ang mga bata nga dili kaadto sa Olango mahimo sila’ng moadto sa sunod nga venue sa Kiddie Land sa Hoopsdome sa Barangay Gun-on karong Disyembre 29-30 sa sama nga oras.
Sa niagi’ng tuig, 7,000 ka bata sa siyudad ug 5,000 sa isla ang niapil sa Kiddie Land. (BANAT NEWS)