Tindahan og pabuto sa SRP abli na
CEBU, Philippines - Gibuksan na ang kapin sa 20 ka tindahan og pabuto sa South Road Properties diin gitugot ang pagpamaligya alang sa Pasko ug Bag-ong Tuig kagabii.
Matud ni Barangay Inayawan Kapitan Lotlot Ignacio-Soon nga gitahasan sa Kasadya sa SRP, nga petsa 15 sa Disyembre ngadto sa 31 ang ila’ng gihatag nga adlaw sa mga manindahay og pabuto nga maka-display sa ila’ng mga baligya.
Ang SRP ang gihimo nga dapit nga baligyaan og pabuto tungod kay open ang lugar ug layo sa kabalayan kung ingkaso may panghitabo sama sa sunog.
Gibutyag ni Soon nga nipadala na sila og suwat sa kapolisan ug sa buhatan ni Racquel Bohol-Arce, ang pangulo sa Prevention Restoration Orderly Beautification Enhancement (PROBE) Team, nga sakmiton gyud ang mga pabuto nga ipang-display lang bisan asa gawas sa SRP.
Si Soon nipadayag nga wala’y problema sa mga kasakyan padulong sa SRP tungod kay adunay mga buses nga iya sa siyudad nga mobiyahe ug sa mga magdala og mga sakyanan aduna usab sila’y ka-parkingan samtang mamalit og mga pabuto. (BANAT NEWS)
- Latest
