Trapiko gibantayan pagbukas sa Gaisano Mambaling

CEBU, Philippines - Giawhag sa Cebu City Transportation Office (CCTO) ang mga motorista nga mangita nalang og lain alternatibong rota kun moagi sila padulong sa Barangay Mambaling.

Kini aron pagpaminus sa gibug-aton unya sa dagan sa trapiko sa dapit tungod sa pagbukas sa bag-o nga Gaisano Grand Mall Mambaling.

Matud ni CCTO Executive Director Atty. Rey Gealon nga gilauman sa ilang buhatan sa grabe nga trapiko tungod sa pagdagsa sa tawo atol sa pagabli sa maong mall.

Dugang pa ni Gealon nga nasabotan na usab nila ug sa management sa mall nga dili tugotan sa CCTO nga moagi sa publikong dalan ang mga delivery trucks sa paingon sa mall.

Kini aron malikayan nga maghuot ang trapiko sama sa nahitabo sa pagabli sa SM Seaside sa South Road Properties ug sa Mambaling access road. Adunay dili mo minus 12 ka enforcers ang ipakatap sa Barangay Mambaling, Jai-alai, ug Duljo Fatima karong adlawa. (BANAT NEWS)