CEBU, Philippines – Nibalik na sab ang laing estilo sa pagpangilad gamit ang bugas sa Siyudad sa Talisay.
Ang biktima mao si Enriqueta Albay, 61-anyos, minyo nga taga Barangay Cansojong samtang ang suspek nagpaila sa biktima nga si Grace Cabalan, hingkod ang panuigon.
Asoy sa biktima nga nikalit og duol ang suspek kaniya ug nagpaila sa iya’ng kaugalingon ug nihagad sa pagbaligya sa duha ka sako nga bugas sa kantidad nga P1,600. Tungod sa kabarato sa presyo, ang biktima dali’ng nisugot ug nitunol sa iya’ng kwarta. Ang suspek nipasabot sa biktima nga iya una’ng kuhaon ang bugas. Apan nilabay na lang ang pipila ka oras wala na nabalik ang suspek dala ang kwarta sa biktima.
Sa nasayran, ang pangan nga gigamit sa suspek mao sab ang iya’ng gigamit kaniadto samtang namiktima sa susama nga estilo.
Gipahimangnuan sa kapolisan ang katawhan nga dili dayon motuo sa bisan kinsa’ng tawo aron malikay sa ilad labi na karong panahon sa Pasko. – /GMR) (BANAT NEWS)