CEBU, Philippines - Ang mga abogado ni Mayor Michael Rama niapelar na sa Court of Appeals ug naglaum nga imando unta nga libkason niini ang duha ka buwan nga preventive suspension nga gipahamtang kaniya sa Office of the President.
Si Rama nagkanayon nga ang iyang mga abogado nga gipangulohan sa iyang anak nga si Atty. Mikel Rama miduso na og Petition for Review on Certiorari and Application for a Temporary Restraining Order. Argumento sa mga abogado sa mayor nga dili gayud angay’ng suspensohon si Rama tungod sa pagpaguba niya sa median structure nga nagsilbe nga road separator sa dalan Katipunan sa Barangay Labangon.
Gibalikbalik ni Rama nga ang DPWH maoy nag-awhag nga ipaguba ang median structure nga gipatukod sa mga opisyal sa Labangon kay makahatag kini og peligro sa mga motorista.
Si Rama miingon nga kwestyonon nila ang suspension order sa Malacañang sa legal nga paagi mao nga wala niya babagi ang DILG nga mi-serve sa suspension order.
Giangkon ni Rama nga nasubo siya pag-ayo apan misaad sa katawhan nga dili niya kini talikdan bisan og nasuspenso na siya sa katungdanan.
Si Vice Mayor Edgar Labella mipahibalo nga misugod na siya kagahapon sa paglingkod isip acting mayor hulip ni Rama ug misaad nga ipatigbabaw niya ang balaod.
Kapin sa 1,000 ka dumadapig ni Mayor Rama ug mga kawani sa City Hall mitambong og misa kagahapon. Human sa misa si Rama mihimo’g kapin sa oras nga diskurso ug nagluhod-luhod pa ug ang tingog pinahilak-hilak. Giklaro ni City Administrator Lucelle Mercado nga ang pagpahigayon nila og misa dili protesta.
Gihulagway ni Rama nga ang iyang sitwasyon karon susama sa gilansang siya sa krus kay sama sa Ginoo nga nagsakripisyo kini para sa kaayohan sa katawhan.
May mga suporters ni Rama nga wala kapugong sa paglugmaw sa luha nga naminaw sa pamahayag sa mayor. (Sheriza Mae R. Uy/RUB)(BANAT NEWS)