Host families sa IEC wa kaabot sa 1,000

CEBU, Philippines – Wala kaabot sa ila’ng target nga 1,000 ka pamilya nga mo-host og mga delegado sa International Eucharistic Congress 2016 sa Sugbo.

Kini ang gitug-an sa Pilgrim Accommodation Committee sa IEC2016 nga gipangulohan ni Msgr. Ruben Labajo. Apan matud ni Labajo nga wala sila nabalaka tungod kay pwerte’ng daghana sa mga Sugboanon nga mopapuyo sa ila’ng mga higala nga delegado nga wala na moagi sa parokya

Sumala pa ni Labajo nga naghinobra ang katawhan nga Sugboanon nga mopapuyo tungod kay adunay mga delegado gikan sa laing lugar nga moderetso og kontak sa ila’ng mga higala ug mga kauban sa grupo nga nia sa Sugbo.

Gibutyag ni Labajo nga sila sa komitiba aduna’y 800 ka pamilya nga opisyal nga nagpalista samtang adunay daghang host families ang wala na nagpalista.

Si Labajo nipadayag nga sa pagkakaron 300 pa lang ka delegado ang opisyal nga nagpalista nga sila magpa-host sa ila’ng pag-apil sa IEC busa malaumon siya nga mapapuyo nila tanang mga tawo nga ila’ng gitagan-an. Nakuyawan hinuon si Labajo nga basin og aduna sila’y pamilya nga gitahasan nga nangandam na apan dili moabot ang mopuyo. – /GMR) (BANAT NEWS)