CEBU, Philippines - Mokabat sa P44 milyones nga kantidad ang gigahin sa kagamhanan sa Dakbayan sa Mandaue alang sa pagpalit sa duha ka moderno’ng fire truck alang sa Disaster Risk Reduction and Management Office.
Ang matag usa nagkantidad og P22 milyones ug mao’y labi’ng una sa nasud.
Gikan sa nasud sa Austria ang mao’ng fire truck ug gipalit kini sa kagamhanan sa dakbayan sa pagpalambo sa pagtubag sa sunog pinaagi sa paggamit sa fully computerized nga fire truck.
Gihimo ang turnover ceremony nga gitambungan usab nila ni Fr. Mariano Cuatro sa St. Joseph School uban usab nila ni Atty. Jamaal James Calipayan, Bise Mayor Glenn Bercede ug mga sakop sa Bantay Mandaue.
Ang mao’ng fire truck adunay automated remote controlled water/foam outlet nga nahimutang sa ibabaw nga bahin niini.
“This is a good choice because with this feature, it reduces the risk of personnel who will operate it manually from being injured, and besides, it increases the pressure of water/foam cannons,” nagkanayon si City Fire Marshall Joel Abarquez.
Matud ni Abarquez ang gidak-on sa mao’ng mga fire trucks mao’y ilang magamit sa mga hagip-ot kaayo nga mga dalan nga may sunog.
Si Felix Suico nga mao’y DRRM officer sa dakbayan, niingon nga ang duha ka fire trucks nga gipalit sa kagamhanan ang dumalahon sa gibansaybansay niya’ng mga sakop. (BANAT NEWS)