CEBU, Philippines - Subling gituki sa committee on environment uban ang nagkalain-laing buhatan ang pag-transport sa delikado’ng kemikal paingon sa Japan.
Matud ni Engr. Teodoro Locson Jr., presidente sa Cebu Common Treatment Facility, Inc. (CCTFI), nga daghang problema sa pag-dispose sa basura nga adunay mercury ilabi na gikan sa kabalayan.
Dugang pa ni Locson nga daghan na-generate sa kabalayan nga adunay delikado nga kemikal sama sa guba nga telebisyon, gadgets, thermometer, battery ug silver liquid.
Samtang si Yasuyuki Yamawake sa Nomura Kohsan nipresentar sa mga nitambong sa waste disposal seminar kun unsaon pag-recyle sa mga butang nga adunay delikado’ng kemikal ug ang epekto kung kini masagol sa hangin ug tubig.
Si Konsehal Nida Cabrera, chairman sa committee on environment ug Konsehal Nestor Archival nagtinguha nga moduso og ordinansahon kalabot sa Waste Electrical ug Electronic Equipment o e-Waste.
Kini aron makabutang og storage facility ang siyudad alang sa delikado nga kemikal sa dili pa kuhaon sa CCTFI.
Ang CCTFI ug Nomura Kohsan adunay kasabutan labot sa pag-transport pinaagi sa barko paingon sa Japan.
Nitambong sa panagtigum ang mga stakeholders kinsa nisuporta usab sa mao’ng plano. (BANAT NEWS)