CEBU, Philippines - Kadagkuan sa simbahan sa Archdiocese of Cebu gusto nga adunay himuong dayalogo sa kagamhanan sa Dakbayan sa Sugbo, Department of Environment and Natural Resources, mga stakeholders ug mga yanong lungsoranon aron tukion ang laraw sa pagbalhin sa mga kahoy diha sa center island sa Pope John Paul Avenue, Barangay Mabolo ning Dakbayan sa Sugbo.
Matud pa ni Archbishop Jose Palma, nga labing maayo kun dili pangibton ang maong mga kahoy, apan kung nakabalda kini sa mga plano sa kagamhanan mas maayong sabotan kini.
Samtang ang Auxiliary Bishop sa Archdiocese of Cebu, Dennis Villarojo ug kasamtangang secretary general sa umaabot nga 51st International Eucharistic Congress (IEC), nibutyag nga wala sila nihangyo sa siyudad nga palapdan ang dalan o tangtangon ang mga center island lakip sa kahoy.
Ang ilang gihangyo nga paninduton lamang ang lugar kay matud niya ang mga kahoy sa palibot nakahatag og limpyong hangin sa katawhan.
Sa laing bahin, natagbaw sa pangandam nga gihimo sa kapolisan si Villarojo human sa ilang closed-door meeting uban sa mga kadagkoan sa Police Regional Office 7 niadtong Martes.
Si Chief Superintendent Prudencio Tom Bañas , regional director sa PRO7, miingon nga nalipay si Villarojo sa ilang presentasyon nga may plano nilang pagka-parehas sa Asia-Pacific Economic Cooperation (APEC) Summit ang seguridad nga gihimo.
Sumala pa ni Bañas kun aprubahan ni Presidente Benigno Aquino III ang ilang hangyo nga klase sa seguridad ila dayon kining ipahibawo sa IEC officials.
Nasayran nga lakip sa mangabot ang unom ka papal nuncios, ug gatosan ka kardinales ug liboan ka kaparian gikan sa nagkadaiyang nasud. (BANAT NEWS)