CEBU, Philippines - Ang kadagkoan sa Cebu City Transportation Office (CCTO) ug Rotary Club of Cebu Port Center molusad og proyekto nga magdasig sa mga traffic enforcers aron moserbisyo gyud sila pagpahapsay sa trapiko.
Si Rotary Club president Dr. Jose “Boy” Unabia mipahibalo kaniadtong miaging semana nga gilusad nila karon ang Search for 10 Most Outstanding Traffic Enforcer ug pasidunggan kini karong sunod tuig.
Matud ni Unabia nga angayan gyud nga pasidunggan ang mga tarong nga traffic enforcers aron sila madasig pa sa pagtuman sa ilang katungdanan.
Si Unabia miingon nga dili sayon ang trabaho sa traffic enforcer nga pagbarug sa karsada, uwan ug init, ug mohanggap sa abog ug aso gikan sa mga sakyanan ug magsakit ang dughan sa mga badlongon nga draybers.
Si Atty. Jose Glen Capanas sa CCTO nagkanayon nga ang tumong sa paghatag og pasidungog sa enforcer makadasig niadtong naglinigoy sa pagserbisyo nga sila mokugi na aron nga sila mapasidunggan.
Apil sa mga basehanan sa mahimong most outstanding enforcer mao ang gidaghanon sa mga traffic violators nga ilang nadakpan, dili kini magsige lang og palta sa trabaho ug ang relasyon niya ngadto sa mga kaubang enforcers.
Kadtong mapili nga outstanding enforcers makadawat og plaque, P10 mil nga cash reward ug P100 mil nga kantidad sa accident insurance.
Dinhi sa dakbayan sa Sugbo adunay dul-an sa 300 ka traffic enforcers nga sakop sa Cebu City Transportation Office. (BANAT NEWS)