CEBU, Philippines - Mga supporters ni Davao City Mayor Rodrigo Duterte ang nitambong sa concert rally diha sa University of the Philippines (UP)-Lahug Cebu Campus kagahapon apan wala moabot ang mayor.
Hinuon diha si Senador Alan Peter Cayetano nga giingong maoy makapares ni Duterte sa presidential ug vice presidential race.
Lakip sa mga nanambong ang grupo sa mga estudyante, non-governmental organization ug mga volunteers ang nipakita sa ilang suporta.
Sa wala pa magsugod ang pormal nga kalihokan, adunay gihimong open forum tali sa mga tinun-an sa kolehiyo ug didto ilang gipahibalo nga ang gusto nilang sunod nga presidente kadtong adunay political will nga mopatuman sa balaod. Sa miaging adlaw una nang gibakwi ni Duterte ang nahauna niyang pamahayag nga di siya modagan sa pagka-presidente ug iyang giingon nga ang panawagan kaniya pagdagan pagka-presidente iyang gikonsiderar pagbalik pinaagi sa pag-ingon:”it’s on the table.”
Si Cayetano mismo mianunsyo niini kagahapon nga mopadayon pagdagan si Duterte sa 2016. Misaad siya nga silang duha mangusog batok kurapsyon ug misaad nga puhagon ang problema sa ilegal nga drugas sa nasud.
Gipahibaw ni Cayetano maong wa katambong si Duterte gumikan kay aduna kini dinalian nga gitambongang tigum. Apan bisan pa man niini, gipadayon gihapon ang nasugdang kalihokan.
Usa ka sulo ginama sa kawayan ang gidagkotan sa mga supporters isip simbolo sa kahayag sa nasud nga matud pa puno sa kangitngit tungod sa kurapsyon ug mga krimen. (BANAT NEWS)