Mga dealers og LPGas canister gi-seminar

CEBU, Philippines – Ang mga tighimo ug tigbaligya og LPGas canister dinhi sa Sugbo mitudlo na sa ilang mga sakop sa mga pamaagi aron malikayan ang mga aksidente nga maglambigit sa ilang produkto.

Dul-an sa usa ka gatus ka dealers og mga LPGas canisters nga gitawag sa uban og “Butane,” mitambong sa seminar nga gipasiugdahan sa mga opisyal sa Cebu Budjet LPGas Association, Inc.

Ang tulo ka oras nga safety seminar didto gipahigayon sa function room sa La Fortuna Bakery sa Basilica del Santo Niño building ug gidumala ni Ed Antiligando, kanhi technical director sa dakong oil company kaniadto.

Si Douglas Labra, presidente sa Cebu Budjet LPGas Association, Inc. mipasabot nga gusto gyud nila nga malikayan ang mga aksidente nga maglambigit ang ilang produkto mao nga mihimo sila og safety seminar.

Ang kahugpongan nga gipangulohan ni Labra moawhag sa Department of Energy (DOE) nga dili dayonon ang pagdili sa pagbaligya sa mga LPGas canisters nga gitawag sa uban og “Butane.”

Matud ni Labra nga ang ilang kahugpongan mikuha na og duha ka abogado aron magtinabangay pag-andam sa mga dukomento aron mahimo nga legal ang pagbaligya sa mga LPGas canisters.

Si John Velasco, director sa Cebu Budjet LPGas Association, mitataw nga dili tinuod ang pamahayag sa kabomberohan nga daghang sunog naggumikan sa paggamit og “butane canisters.”

Gipresentar ni Velasco ngadto sa mga tigbalita ang dukomento nga nakuha nila gikan sa Bureau of Fire Protection (BFP) nga nagpakita nga ang misuse og electricity ug electrical short circuit maoy sagad hinungdan sa mga sunog.  Si Jun Alforque, laing direktor sa kahugpongan sa mga LPG refillers, miawhag sa ilang mga dealers nga magbaton gyud og fire extinguishers diha sa ilang mga tindahan aron magamit dayon kun may panginahanglan.

Samtang ang mga tigbaligya og LPGas canisters gidasig sa pagbutang og mga safety signage sa ilang mga tindahan nga magpahinumdom sa mga pumapalit nga dili sila magdagkot og posporo duol sa tindahan.

Matud ni Labra nga ang ilang kahugpungan dili na mogamit og mga tayaon nga canister aron sa pagsiguro nga luwas kini gamiton. Pabor si Labra nga kampanyahan sa DOE ang mga backyard refillers kay wala sila’y kasinatian sa trabaho.  (BANAT NEWS)