CEBU, Philippines - Usa ka 23 anyos nga bag-ohay lang nanganak pinaagi sa Caesarian Section, sa Vicente Sotto Memorial Medical Center ang nibasol sa mga doktor nganong hangtud karon di pa gihapon siya makalihok-lihok.
Naabtan pa sa Banat News sulod sa iyang balay sa Sitio Baybayon, Barangay Pitalo sa lungsod sa San Fernando si Jermelyn Bactismo kuyog sa iyang duha pa ka semana nga anak.
Matud niya maglisod pa gihapon siya sa paglihok karon tungod kay aduna pa gihapon siyay catheter bisan niadto pang Nobiyembre 6 siya gipaubos sa caesarian section.
Matud pa ni Bactismo, magsige gihapon og ngutngot ang iyang operasyon.
“Gipahibalo ko sa doktor nga nagisian akong pantog, sa dihang niguwa na ang bata, kay nihubag daw ako pantog, unya nisikit sa ako matris ug wala nila nabantayi naigo nila atol sa paghiwa sa akong matris,” matud pa sa ginang.
Apan ang gikasagmuyo niya, human siya nakagawas wala na magtagad ang doktor ug ang tambalanan.
Sumala pa niya, gi-refer siya nila ngadto sa pribadong tambalanan aron ipatan-aw kun wala nay leak ang iyang pantog aron matangtang na ang iyang catheter.
“Akong gikagul-an kay paadtuon mi sa pribado nga tambalanan nga wala man intawon mi kwarta para sa maong tambal ug sa motrabaho niini,” matud niya.
Si Bactismo, nipadayag nga kong dili patanglihogan iyang mga hangyo, posibleng moduso siya og reklamo batok sa maong tambalanan.
Ang tigpamaba sa VSMMC nga si Eleodoro “Nonoy” Mongaya miawhag sa ginang nga moduso og pormal nga reklamo aron mahatagan og katin-awan ang pasangil.
Samtang si Bernadine Hayag, tigpamaba sa Department of Health nga nahinabi sa Banat News miingon nga wala pa sila nakadawat og reklamo may kalabutan sa maong reklamo apan matud niya aduna silay fact finding committee nga mosusi niini. (Rowena D. Capistrano/EIM)(BANAT NEWS)