CEBU, Philippines - Tulo ka panimay ang nasunog human nisilaob ang motorsiklo nga napiksan sa nagbagang pabuto nga piccolo diha sa Canton Beach, Barangay Cansojong, dakbayan sa Talisay niadtong Miyerkules sa gabii.
Ang mga nasunogan mao sila si Earl John Enrile; Neil Anthony Canton ug Veronica Therese Canton.
Matud pa ni Senior Fire Officer 2 Sherwin Algoso, adunay mga bata nga nagduwa nga nagsige og pabuto og piccolo duol sa panimay ni Enrile.
Asoy pa ni Algoso nga pagbuto sa picolo nipisik ang nagbaga nga papel niini ngadto sa motorsiklo nga adunay nagtulo nga gasolina hinungdan nga nisilaob kini. Nagkanayon si Algoso nga daling nanagan ang mga bata , apan ang kalayo daling mitapon sa balay ni Enrile ug mikatay sa mga kasikbit niining balay.
Si Veronica nipasangil usab nga samtang tuod adunay mga silingang nitabang pagpawong sa kalayo sa ilang balay, adunay uban nga nisuway og kawat sa iyang cellphone apan ilang nasakpan ug gipagawas.
Si Konsehal Danny Caballero nga niresponde sa maong sunog ang mimando sa mga tawo nga mopalayo kay nikidlap ang mga linya sa kuryente sa poste duol sa mga nasunog nga balay. Nakontrolar dayon sud sa tulo ka minutos ang kalayo. Apan tungod kay ginama tanan sa light materials ang mga panimay dali kining nikatap ug nagbilin og P100 mil nga danyos.(Gabriel Bonjoc/EIM)(BANAT NEWS)