CEBU, Philippines - Usa ka 21 - anyos nga lalaki nga gituohang nagumon sa ginadiling drugas ang misunog sa panimalay sa iyang iyaan ug nang-hostage og duha ka bata diha sa Sitio East Binabag, Barangay Tayud, Lungsod sa Consolacion kagahapon sa hapon.
Ang suspetsado kinsa nagtingkagol na karon sa karsel mao si Jello Ray Ramos, molupyo sa maong dapit. Ang mga bata nga gi-hostage niini nag edad og 5 anyos ug 7 anyos nga iyang mga silingan.
Gibutyag ni Police Officer 1 Marivic Pepito, sa Women's and Children Protection Desk (WCPD) sa Consolacion Police Station, kagahapon pa sa buntag nagsige na og hasi si Ramos ug ilaha kining narespondehan. Pasado alas 2 giingong naglalis ang suspek ug ang iyaan niini apan kalit niining gisunog ang panimalay sa iyaan ug naamong pa ang laing pito ka panimalay.
Unang miresponde ang mga tanod sa lugar kinsa gitabangan sa mga silingan aron pag-ila niadtong nagsunog apan dihang dakpon na unta kini kalit niining gibira ang 7 anyos nga bata nga miagi sa iyang tungod ug gi-hostage apan nilugnot ang bata ug nakalingkawas.
Ang suspek nangita og laing bata ug didto iyang nakit-an ang 5 anyos nga bata ug mao na usab ang iyang gi-hostage ug gitionan og kutsilyo.
Nakig-negotiate ang mga silingan ngadto sa suspetsado samtang nagpadayon ang pagpawong sa kalayo sa ilang lugar apan si Ramos miingon nga mohunong lang siya sa iyang gibuhat kun adunay mo-video niya ug i-upload sa social media aron siya mosikat.
Paglabay sa pila ka minutos nga negosasyon nabuhian niini ang bata maong midagan ang suspek apan wala siya gilung-an og gukod sa mga tawo hangtud nga siya nadakpan.
Ang duha ka bata nakaangkon og ginagmay nga mga samad sa ilang kamot ug dughan tungod sa pagsige og tion kanila og kutsilyo sa suspek.
Ang mga ginikanan sa bata nga nakahinabi sa Banat News desididong mopasaka og kaso batok sa suspek.
Gihulagway ni Pepito adunay mga senyales nga ubos sa impluwensiya sa ilegal nga drugas ang suspek. Nasayran nga niadtong bulan sa Septiyembre nadakpan na usab sa Consolacion Police ang suspetsado tungod sa pagluklok og mahait nga hinagiban.
Kasong serious illegal detention in relation to Republic Act 7610 kon child abuse ug arson ang ipasaka batok sa suspek.
Base sa talaan sa Bureau of Fire Protection (BFP) – Consolacion, walo ka mga panimalay, sagad ginama sa light materials ang nasunog apil na ang sa iyaan sa suspek.
Matud ni SFO2 Jemecerio Borres sa BFP mokabat sa P600 mil ang danyos sa maong sunog . (Decemay P. Padilla/EIM)(BANAT NEWS)